گیلکی یم

یکته خوجیر شئر اوسسا شهرام دفاعی جی


مه رهꞌ دئه نشناسی؟…..گیلکی یم من!

بیبی گیلک؛ بزین نانی؟ کی یم من؟!!!
جه پورزماتˇ ایامˇ شینم من
هیزاران ساله أ خاکَا دینم من
می أمرهꞌ بو کی مار گارهꞌ واشاندی
می أمرهꞌ بو کی خو جاغله ره خواندی
می جه بؤ کی دوخاندی زای خو مارهꞌ
نیشاندی گیلانی خو توم بجارهꞌ
مالا خاندی خروسخان را دکفتی
معاشˇ رئه شویی، دریا دکفتی
چایی چینانˇ خسته جانه أمرهꞌ
زن ؤ مردای؛ پیر ؤ جوانه أمرهꞌ
می جه بؤ کی توقایی؛ جان بیگفته
ایزه عاشیقˇ دیل، سامان بیگیفته
زاما دیلواپس ؤ جه بی قراری
شؤیی عروسه خانه خاسه گاری
نمادˇ مردومˇ گیلان زیمینم
گیلانی ره همیشک، بهترینم
ایسابوم غورصه ؤ شادی میانی
دبوم هر کوی ؤ آبادی میانی
مرأ دئه نشناسی؟… تی جانا قوربان؟
منم، گیلکی یم؛… صفایˇ گیلان
می کوگا میانی، بیگانا بُستم!!
مه ره صابخانه بؤم؛ بی خانا بُستم!!
کوچی جاغلانه رئه؛ غریبه یم من
خیال کونی، نوشوسته میوه یم من!
ببوسته عار أمی جأ آشنایی؟
دینی ولله؟…….یعنی هنقد جودایی؟؟
تی ماره لَهجه یم من؛ گیلکی یم..!!
هَسَه دئه باعثˇ شرمندگی یم ؟!!
چوطو جَختر بری ماره زوانهꞌ…؟!!
چی وا پیغام فادی، آیندگانهꞌ…؟!!
جه یاد بردن مه رهꞌ، خیلی جفایه
بدأر می احترامهꞌ، تی صلایه
گدایی؛ رعیتی، ارباب ؤ خانی
ببه تی ایفتخار، گیلک زوانی
گیلانی رئه گیلˇ گب زئن قشنگه
بداشت هرکس خو آدابهꞌ؛ زرنگه
تی گردن شق ببه تا زنده یم من
ههꞌ آب ؤ خاکه دس پرورده یم من
منم گیلکی یم؛…. می ریشهꞌ نازم
نانی؟ بدان،…….کی گیلکه گولازم

دامون

دامونم زاده زلزله‌ای مردم کش

یک دیدگاه در “گیلکی یم

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *